قصيدة للشاعر حسام خليل عضو الرابطة دفاعا عن محمد خيري المعتقل للمرة الثانية خلال شهر رغم صدور قرار بالإفراج ترفض الداخلية تنفيذه
أنا مصري بحب الحرية
حبسوني في بلادي الغالية
أخلوا سبيلي ورجعوا خادوني
وأخلوا سبيلي المرة التانيه
وانا دلوقتي في الزنزانة
مش على ذمة أي قضية
ولما سألت الظابط قالي:
يظهر خيبتك خيبة قوية
يخرب بيت عقلك يا محمد
ضعت ورحت ف شربة مايه
قلت ياباشا عايز اتنفس
طب ليه بس مغمي عنيه
اسمك سنك أصلك فصلك
يلاّ جاوبني بسرعة شويه
مسلم واسمي محمد خيري
مش عارف ليه قبضوا عليه
وسني يادوب عدّى العشرين
وبطاقتي أدامك اهيه
من مواليد مركز سنورس
فيومي ومصري الجنسية
ومدون واسم مدونتي
جر شكل بس بحنيه
ومهندس عايز اخدم بلدي
علشان تفضل أم الدنيا
بس خدوني وجم خطفوني
من بيتي بإدين مصرية
ومكنتش هستسلم أبدا
لو كانت بإدين غربية
واللي غايظني انها مصرية
وسابت ف بلادي الحرمية
مصري وجي يكلبش إيدي
آه يا خسارة على الوطنية
مصري وجي يهاجم بيتي
ويعيش ف بطولة وهمية
فاكر إنه بيخدم بلده
لما يكلبش تاني إديه
داخل يهجم يرعب يقلب
ويصحّي الناس من حواليه
علشان يزرع فينا الخوف
علشان نفضل في السلبية
ونغمض ونسيب الظالم
ينهب مواردنا الحيوية
ونسيب أهلي وناسي ف غزة
بين الأنياب اليهودية
واسأل يا شعبي المرعوب
كل الأطراف المعنية
هو احنا بنحمي المظلوم
ولاّ بنحمي الصهيونية؟
واسأل بردو محمد خيري
ليه حرموه نور الحرية؟
نفسي اعرف إيه ذنبي يا ناس
دي مصر ف قلبي وجوا عنيه
وبحب الأقصى وحماس
ونفسي يا مصر تعيشي أبيه
ليست هناك تعليقات:
إرسال تعليق